KALIBO, Aklan—Kapin sa 20 ka mga establisyimento ro nagsarado sa probinsya it Aklan kasunod it mabahoe nga epekto sa ekonomiya ag turismo it coronavirus disease ukon COVID-19.
Raya ro ginkumpirma ni Department of Labor and Employment ukon DOLE-Aklan head Carmela Abellar sa plenaryo sa ginpatigayon nga committee hearing it Committee on Health and Social Services it Sangguniang Panlalawigan it Aklan nga ginpangunahan nanday Chairman Nelson Santamaria, board member Jose Miguel Miraflores nga gin-atendiran man nanday board member Soviet Russia Dela Cruz, board member Ramon Gelito ag Vice Gov Reynaldo Quimpo.
Sa nasambitang numero daywa kara ro sa Kalibo International Airport ag 18 ro sa isla it Boracay.
Raya hay bangud sa kawad-an it customers halin kat ginsuspinde ro international flights maghalin sa Wuhan ag Hubei province sa China.
Mag-eowas kara, 20 ka mga establisyimento man sa isla ro nagpatuman it flexible work scheme ukon ginbawasan ro adlaw it trabaho it mga empleyado agud nga mamintina it management nga bukas ro andang negosyo.
May kaangtanan kara, 378 ka mga filipino workers ro nawad-an it trabaho ag kapin sa 1,290 ro nagpaidaeom sa flexible work scheme.
Samtang, ro mga Chinese workers nga nawad-an it trabaho hay ginpabakasyon anay it andang mga amo sa ibang lugar bangud nga inde man ro mga raya makabalik anay sa China, ro nasyon nga epicenter it makamaeatay nga sakit.
Samtang sa pihak nga parte, kapin sa 204 aliens workers ro iya makaron sa probinsya it Aklan.
Sa nasambitang numero, 194 ro presenteng idto sa isla it Boracay kon sa siin 64 kara hay mga Chinese workers nga ro pila kanda hay nawad-an man it trabaho kasunod it pagsarado sa establisyimento nga andang ginatrabahuan.
