Haeos 50 porsyento eon it mga kandidato sa provincial level ro naka-file it COC—Comelec

KALIBO, Aklan—Amat-amat eon nga nag-abo ro mga kandidato nga nagdihon it Certificate of Candidacy (COC) kahapon, Oktobre 6.

Suno kay Crispin Raymund Gerardo it Commission on Elections (Comelec)-Aklan nga haeos 50 porsyento eon it mga kandidato sa provincial level ro naka-file it andang COC.

Pila sa mga nauna eon nga nagdihon it andang kandidatura para sa nagahilapit nga May 9, 2022 election hay sanday incumbent Aklan 1^st District Congressman Carlito Marquez ag Sangguniang Panlalawigan member Atty. Harry Sucgang para sa pagka-kongresista sa unang distrito.

Nagapabilin man nga si retired Lt. Matt Wacan ro nagdihon it COC para sa pagpadaeagan bilang kongresista sa 2^nd district.

Sa pagka-gobernado hay sanday Ibajay Mayor Jose Enrique Miraflores ag Welfredo Tolentino.

Samtang, si incumbent Vice Governor Reynaldo Quimpo pa eamang ro nagdihon it kandidatura para sa pagpa-ilihir bilang bise gobernador.

Base sa datus it Comelec-Aklan, may waeo eon ka mga Sangguniang Panlalawigan aspirant sa 1^st district nga nag-file it COC nga ginaekaeakipan nanday Ricardo Agravante, Jethro Laserna, Rammy Panagsagan, Teddy Tupas, Nemesio Neron, Mark Ace Bautista, Apolinar Cleope ag Mark Quimpo.

Samtang, sa 2^nd district hay nakalista ro taeatapan it lima ka mga board member aspirant nga ginakaeakipan nanday Jay Tejada, Plaridel Solidum, Bayani Cordova, Romeo Dalisay ag Jupiter Gallenero.

Ginaeauman nga magabuhos sa ulihing daywang adlaw ro mga kandidato rason nga padayun ro pag-apela it Comelec nga siguraduhon nga kompleto ro pag-fill up sa mga ginadihon nga COC para malikawan ro anumang problema.