KALIBO, Aklan—Gin-umpisahan eon makaron nga adlaw it Biyernes it Provincial Health Office ro pagpatigayon it intensified community testing para sa Coronavirus Disease 2019 ukon COVID-19 sa tanan nga mga residente it Purok 1, C. Laserna St. Kalibo.
Suno kay Dr. Cornelio Cuatchon Jr it PHO-Aklan nga pitong ka-team ro anang ginbilog nga ginpangunahan it mga tawuhan it Molecular Diagnostic Laboratory it Aklan Provincial Hospital nga nagbo-oe it swab specimen sa kapin sa 500 nga mga indibiduwal nga naga-edad it limang dag-on pataas.
Suno kana nga may ikasarang ro laboratory nga magpatigayon it 500 hasta 600 nga tests.
Ro makitaan sigon it sintomas hay insigidang pagadaehon sa facility quarantine.
Pwede sigon raya nga makonsidera nga second wave pagkatapos it 1st wave nga natabu sa mga personnel it provincial hospital bangud sa nagtinaas nga kaso it sakit nga base sa andang pinaka-ulihing listahan hay nag-abot eon sa 26 eon ro numero.
Madumduman nga ro lugar hay nauna eon nga ginpaidaeum sa hard lockdown ko nobyembre 20 ag indi pa masayuran kon magatapos raya sa disyembre 4 bangud nga pagahueaton pa ro resulta it swab test.
