KALIBO, Aklan—Ginpahayag it Aklan Provincial Health Office nga kapin sa 65 porsyento sa mga pasyenteng namatay sa covid-19 sa Aklan provincial hospital hay mga senior citizen nga uwa nabakunahan kontra sa nasambit nga deadly virus.
Bangud kara, nagpanawagan si Dr. Leslie Ann Luces it PHO Aklan sa mga senior citizen nga inde eon magduha-duha ag magpabakuna eon kontra sa makataeapon nga masakit.
Nasayuran nga uwa pa it naimbento nga bueong kontra sa covid-19 apang pwede nga malikawan ro grabeng igo kara sa eawas it tawo kon protektado it bakuna kamana man ginasunod ro ginapatuman nga minimum health protocols kaparehas it pagsuksok it facemask ag faceshield, pagpractice it physical distancing kamana man pagsanitize it alima gamit ro alcohol ukon sabon.
Sa pinakaulihing datos it Aklan Provincial Epidemiology Surveillance Unit it nasambit nga taeatapan, nagaabot eon sa kabilugang 11,502 ro kaso it Covid-19 sa bilog nga probinsya it Aklan.
Sa nasambit nga numero, 10,442 ro nakarekober eon matapos nga nagpaidaeom sa pagbueong ag quarantine procedure ag 286 ro binawian it hueam nga kinabuhi.
Sa makaron hay may 774 pang aktibong kaso it sakit nga ginakaeakipan it 424 nga presenteng una sa quarantine facility, 268 nga naka-home quarantine ag 82 ro admitted.
