KALIBO, Aklan–Ginaboeobanta nga haeos 69,000 nga mga botante sa banwa it Kalibo ro ginaeauman nga magapasakop sa Barangay ag Sangguniang Kabataan elections sa Nobyembre 2, 2026.
Suno kay Atty. Christian Itulid, municipal election officer it Commission on Elections ukon Comelec-Kalibo, kapin sa 52,598 ro rehistradong botante para sa barangay elections samtang haeos 16,299 man para sa SK elections.
Dugang pa kara nga may kabilugan nga 18 nga igatukod nga voting center, kun sa siin daywa sa barangay poblacion ag 2 man sa barangay andagao nga makabig nga may pinakamaabu nga mga populasyon.
Samtang, ginpahayag pa ni Atty. Itulid nga una eon sa ulihing parte ro andang preparasyon para sa eleksyon.
Nagdugang sigon it clustered precinct rason nga nagdugang man it mga gin-hire nga magaserbing electoral board.
Posibleng sa buean it Oktubre hay maka-post eon sanda it list of voters.
Sa pihak nga parte, maskin nga may tatlong proposed bill sa Kamara nga nagatuyo nga uman nga ipaiway ro Barangay and SK election bangud sa energy crisis, kalamidad ag iba pang logistical concerns, ginpahayag ni Atty Itulid nga magapadayun ro Comelec sa pagpahaum para sa Nobyembre 2 nga eleksyon bangud nga owa man sanda it may nabaton nga opisyal nga abiso angot sa pagbag-o it schedule.
Magapadayun sigon ro eleksyon sa Nobyembre 2 mag-eowas eon lang kon makaangkon it bag-ong laye nga magapaiway sa gintaeana nga petsa.
Maga-arangkada eon man sigon ro filing it certificate of candidacy sa ulihing domingo it Setyembre.
