KALIBO, Aklan–Naga-abot sa haeos 700 ka mga benepisyaryo ro natigayun nga mataw-an it educational assistance halin sa DSWD makaron nga adlaw it Sabado.
Suno kay Beverly Salazar, Provincial Link it Pantawid Pamilyang Pilipino Program (4Ps) nga naging mas maayos ro daeagan it payout makaron kumpara ko unang adlaw it distribusyon.
Aminado si Salazar nga may pilang benepisaryo nga ginpabalik matapos nga makaangkon it kakueangan sa andang daea nga dokumento ag may ibang na-disqualify partikular ro mga miyembro it 4Ps.
Matueopangdan nga ginsaksihan ni DSWD Undersecretary Allan Tanjusay ro ikaywang dominggo it distribusyon it educational assistance sa probinsya it Aklan matapos imaw nga ginpadaea ni DSWD Sec. Erwin Tulfo agud nga personal nga i-monitor ro pay-out.
Samtang, uman nga ginpadumdom ni Salazar ro mga nagahandom nga makabaton it ayuda nga magparehistro anay online ag maghueat it text message antes mag-adto sa gintaeana nga venue.
Raya hay para malikawan nga makaangkon it problema kamana man nga owa sanada nagabaton it walk-in.
