KALIBO, Aklan — Haeos 95% it mga kandidato sa probinsiya it Aklan ro nakasumite it andang Statement of Contributions and Expenditures (SOCE) antes ro 5:00 PM nga deadline ko Hunyo 11.
Raya ro ginpahayag ni Chrispin Raymund Gerardo, tagapaghambae it Commission on Elections (Comelec)-Aklan.
Suno kana nga may pilang mga nagdaog nga kandidato nga hasta sa makaron hay owa pa nakasumite it andang SOCE sa indi masayuran nga dahilan.
Baeantayan sigon raya kasunod it ginpaguwa nga mandu it Department of the Interior and Local Government (DILG) nga ro mga nagdaog nga kandidato ko nagtaliwan nga eleksyon hay indi makapungko sa puwesto kun mapas-eawan nga makasumite it SOCE.
Ro mga nagdaog, napiyerde ukon nag-withdraw nga kandidato nga indi kara makasunod hay magapangatubang sa administrative fine nga nagabalor it P10,000 hasta P60,000 ag perpetual disqualification to hold public office ukon indi eon makapanerbisyo sa gobyerno maskin pa nga raya hay appointive ukon elective position.
Dugang pa nga ro posisyon it kandidato nga indi makasumite it SOCE hay pagakabigon nga bakante base sa Omnibus Election Code.
Pwede eamang nga mapun-an ro posisyon sa oras nga ro kandidato hay eubusan eon nga makasumite it SOCE sa sueod it 6 nga buean halin sa anang proklamasyon.
