KALIBO, Aklan–Haeos 95 porsiyento eon nga sigurado ro oposisyon sa probinsiya it Aklan nga si dating Kalibo mayor Wiliam Lachica ro andang magiging opisyal nga kandidato sa pagka-gobernador.
Raya ro ginpahayag ni Sangguniang Panlalawigan member Atty. Harry Sucgang.
Suno kana nga target it andang grupo nga si board member Atty. Nolly Sodusta ro andang pagaboe-on nga kandidato sa pagka-bise gobernador.
Apang bangud nga maeapit sigon raya kay Aklan 1st district congressman Carlito Marquez nga nauna eon nga nagbalik sa partidong tibyog-akean ag ginapuntirya man nga boe-on nga kandidato it nasambit nga partido hay paga-istoryahan pa nanda raya.
Samtang, full support man sigon ro andang grupo engkaso nga magpa-ilihir si dating Makato mayor Jun Legaspi sa pagka-kongresista sa ikaywang distrito it probinsiya.
Padayun pa sigon ro andang pag-finalize sa mga magiging kandidato it partido sa eastern side samtang sanday Legaspi ro nakatoka sa western side.
Gindugang pa ni Atty. Sucgang nga interesado man kunta imaw nga magpa-ilihir sa pagka-kongresista sa unang distrito it probinsiya , apang bangud sa kakueangan it makinarya rason nga nagaduha-duha pa.
Suno kana nga bastante eamang ro anang pondo para sa campaign paraphernalias ag mobility apang owa it pangbakae it boto.
Nagapati ro opisyal nga kon owa it vote buying ag maduea man ro korupsyon.
