KALIBO, Aklan—Haeos 99.5% eon it mga panimaeay ag establisimento ro natigayon nga mapaiwagan it Aklan Electric Cooperative ukon Akelco haeos sang buean pagkatapos it pagpanaeasa it bagyong Ursula sa probinsiya it Aklan.
Suno kay Akelco general manager Engr. Alexis Regalado nga raya ro pinakamadasig nga restoration it supply it kuryente pagkatapos it sangka kalamidad.
Mabahoe sigon ro andang pagpasaeamat sa 21 nga task force teams nga kaeabanan nga naghalin sa Visayas ag Mindanao nga nagbulig sa pag-ayos it mga nasamad nga linya ag poste it kuryente sa mga komunidad it Aklan kamana man sa mga banwa it Pandan ag Libertad sa Antique nga sakop it coverage area it Akelco.
Gindugang pa ni Engr. Regalado nga pagapasidunggan ro mga naging kaparte it Task Force Kapatid teams sa send-off ceremony sa Enero 24.
Mag-eowas kara, pagataw-an man sanda it kahigayunan nga makabakasyon sa isla it Boracay sa adlaw it Huwebes antes nga magbalik sa andang natungdan nga mga electric cooperatives.
Nasayuran nga kon may kalamidad man sa ibang lugar nga nagakinahangean it task force hay naga-volunteer man eagi ro Akelco rason nga maabung electric cooperatives ro nagsabat sa andang panawagan para sa madasig nga restoration it elektrisidad sa Aklan ag parte it Antique kat tumama ro bagyong.
Gindugang pa ni Engr. Regalado nga kompleto man sanda sa kagamitan rason nga owa it masyadong naging problema.
Kapin sa 1,488 nga poste it Akelco ro pinatumba it bagyo nga naging rason it pagkaduea it supply it kuryente it masobra sa 500,000 nga mga residente.
