Naga-abot eon sa 323 ro naitalang kaso it dengue sa Tacloban City, Leyte hasta ko Agosto 26, kun sa siin, haeos katunga it 138 nga barangay sa siyudad ro may kumpirmadong kaso.
Suno sa City Health Office (CHO), posibleng padayun pa ro pag-abu it mga kaso sa masunod nga mga binuean bangud sa pirmeng mga pag-uean nga nagiging paborableng kondisyon para sa pag-abu it Aedes mosquitoes nga nagadaea it dengue virus.
Gin-engganyo man ni City Health Officer Dr. Jaime Opinion ro mga opisyal it barangay ag residente nga magpatigayon it regular nga paglimpyo sa andang mga komunidad ag baeay.
Kaibahan sa mga dapat tutukan hay ro mga lugar nga pwedeng istaran it namok kapareho it mga kariton, bote, lata, balde ag iba pang bueutangan nga nagatipon ro stagnant water.
Samtang, ginpahayag ni Dr. Gloria Fabrigas, hepe it Tacloban City Hospital, nga 180 pasyente it dengue ro andang nabueong umpisa Enero hasta ko nagtaliwan nga domingo. Sa mga raya, 34 porsiyento hay naga-edad it 6 hasta 20, ag kaabuan hay halin sa grupo it mga eaeaki.
