Sa pihak it pag-aray sa pagtaas it presyo, may mga kasimanwa kita nga nahimo pa gihapon nga magsugae.
Sa baylo nga ipangbakae it pagkaon para sa pamilya, igataya pa.
Angot sa padayun nga pagkalhit it illegal gambling, ginmanduan eon it Philippine National Police (PNP) ro mga tawuhan kara nga maging agresibo sa kampanya kontra sa mga raya.
Kaibahan eon ro mga ilegal nga peryahan nga naga-operate sa nagkaeain-eain nga lugar sa nasyon ag nagapasugae.
Kun sa siin magapatuman man it “one strike policy” sa mga police commander nga mapamatud-an nga nagpabaya sa trabaho ag nakipagsabwatan pa sa mga operator.
Base sa monitoring it PNP, nagatuhaw nga ro CALABARZON ro rehiyon sa nasyon nga may maabung ilegal nga peryahan.
Rason nga kinahangean ro paghueag kara it mga opisyal.
Samtang, sambilog pa sa nausong sugae makaron hay ro online sabong it mga damang nga ro iba hay naga-abot pa sigon sa ginatos kalibung piso ro pustaan.
Ag ro mga ginapa-away nga damanag hay ginasugid nga ginapa-inom pa it bitamina ag steroids.
Paandam it PNP, ilegal ro spider derby.
Tanan nga hampang basta nga may pustaan, ginakabig nga illegal gambling sa idaeum it PD 1602.
Ag ro tanan nga mga madakpan nga eakot sa ilegal nga sugae hay may paga-atubangon nga kaso.
Sa sugae, magdaog ka man, mas maabu sa gihapon ro pierde.
Kon eubusan eon nga maadik ag maeubong sa utang, dikara eon magasueod ro gulo hasta nga masamad ro kabuhi ag daeahig pati ro pamilya.
Rason nga antes nga magtaya, pag-isipan anay it mayad, haum ka baea sa tanan nga posibilidad?
Haum ka baea nga maubos ag maguba it sugae.
