Kabilugan nga P89.79 bilyon pesos nga balor it nagkaeain-eain nga ilegal nga droga ro nadakpan sa nasyon.
Raya hay sang buean antes nga magpanaog sa puwesto si Pangueong Rodrigo Duterte nga nauna eon nga naglunsar it giyera kontra ilegal nga droga.
Sa ulihing Real Numbers data nga ginpaguwa it Philippine Drug Enforcement Agency (PDEA), sa balor it mga droga nga nakumpiska, P77.01 bilyon pesos hay shabu.
Nasayuran nga sa pag umpisa it administrasyong Duterte ko 2016 hasta ko Mayo 31, ginsamad ro may kapin sa 8,194.89 kilo it shabu, 5,111.76 kilo it marijuana, 23.70 kilo it ecstasy, 534.20 kilo it cocaine ag 3,491.23 kilo it iba pang droga.
Mag-eowas kara, 1,197 drug dens ro nadiskubre, kamana man ro 19 nga laboratoryo it shabu, 15,271 high-value targets man ro naaresto.
May 6.252 drug suspects man ro napatay sa 239,218 operations.
Kabilugan nga 25,361 sa 42,045 barangays sa bilog nga nasyon ro gindeklarang drug-cleared, 6,753 man ro drug-free ag 10,112 barangays ro may isyu pa sa droga.
Grabe gihapon ro ilegal nga droga sa nasyon.
Medyu owa nahadlok ro mga drug lords, pusher ag adik sa paandam it pangueo.
Maabu gihapon ro nakaka-eusot.
Makasueubo bangud sa pihak it kapigaduhon, maabu sa gihapon ro naga-bisyo.
Sa pihak it pag-instrikto ag pagbantay it gobyerno, maabu gihapon ro nakaka-eusot.
Kabay nga sa masunod nga administrasyon hay maging mas maisog ag mautak eon ro mga otoridad kontra droga.
Ray hay sambilog sa mga saeot sa sosyudad nga kun eubusan nga maduea hay magasoehay ro pagpangabuhi.
