Nag-abot eon ro gin-import nga tone-toneladang sibuyas halin sa China.
Maskin nga owa pa raya ginpapanaog sa merkado bangud nga kinahangean pa nga magpaidaeum sa ikaywang inspection.
Engkaso nga matapos raya, posibleng mabatyagan eon ro mabahoe nga pagnaba sa presyo kara.
Grabe ro natabu nga pagtaas sa presyo it sibuyas, only in the Philippines eang ro nagakatabu nga naga-abot sa P700 pesos ro presyo kara eabi eon ko holiday season.
Makaron hay nagdungan pa ro pag abot it mga imported nga sibuyas sa tiempo it anihan it mga lokal nga mangunguma.
Buot hambaeon nga maga-abu ro supply rason nga pagaeauman ro pagnaba it presyo.
Sa mga pilang buean nga kalbaryo sa presyo kara, owa ginpaathag it mayad sa mga consumer kun ham-an raya nga natabu.
Ro gusto eamang nga matabu makaron it kaabuan nga mga bumaeakae hay mapanaba eagi ro presyo agud nga indi eon magdugang sa pag-antus nga naexperiensiyahan makaron.
Tapos eon kita sa sibuyas, presyo eon man it itlog ro nagasaka makaron.
Pagkatapos ayhan it itlog, ano eon man ro masunod nga magasaka.
Owa eon it katapusan nga pagtinaas.
Ro presyo it petrolyo hay matsa trumpo nga nagataas-naba man ro haega.
Okey man kunta kon nagataas ag naganaba apang ro masubo kon magtaas it bigtime, kon naganaba hay sangkiri.
Maskin anong pagtipid ro obrahon it mga pumueuyu, owa it epekto.
Rason nga gina insister it publiko, imbes nga tutukan ro ginaduso nga Maharlika Investment Fund, mas mayad nga taw-an it atensyon anay nga mapanaba ro presyo it mga baeak-eon.
Raya ro mas kinahangean sa makaron.
Eabi pa ag raya ro nabatyagan ag mas madaling maintindihan it mas kaabuang Pinoy.
