KALIBO, Aklan—Haeos tanan nga mga natungdan nga lokal nga gobyerno sa probinsya it Aklan hay nakapatigayon eon it vaccination rollout sa nakasueod sa A1 group ukon ro mga ginakabig nga frontliners.
Suno kay Provincial Health Officer 1 Dr. Cornelio Cuatchon Jr it PHO Aklan, ro mga nakaabot it 70 porsyento base sa andang ginatamdan nga masterlist hay nagdiretso sa pagbakuna sa andang mga pumueoyo nga senior citizen.
Ro ibang mga frontliners hay nakabaton eon it andang Sinovac covid-19 vaccine second dose.
Ro mga naturukan it Astrazenica vaccine sa first dose hay uwa pa ro mga raya nakapangaywa.
Sa makaron suno kay Dr. Cuatchon, ro mga nakasueod sa A1 group hay kapin sa 8,843 ro nabakunahan it sinovac vaccine samtang 110 ro naturukan it Astrazenica.
Sa nasambit nga numero, 2,859 ka mga indibidwal ro nakakumpleto eon it andang sinovac covid-19 vaccine base sigon sa regional vaccination operation center as of May 11, 2021.
Magapadayon suno kana ro vaccination rollout it mga LGU’s engkasong mag-abot ro iba pang doses it mga bakuna.
