Gindihon ni Davao City 1st District Representative Paolo Duterte ro hagna nga pagahimuon nga fixed ro sweldo it mga barangay officials ag pagahimuon sandang mga regular government employees.
Ginpaathag ni Cong. Duterte, ro barangay sigon ro makabig nga unang opisina nga paga-adtonan it mga tawo nga kung siin magasabat sa nagakaeain-eain nga isyus sa pihak pa it andang regular duties ag responsibilities.
Suno kay Duterte nga bilang nagapanguna nga political unit, ro barangay ro nagaserbi nga primary planning ag implementing unit it mga plano, programa ag sueundanan it gobyerno.
Kung siin tyempo eon sigon para ro mga barangay officials hay taw-an it nagakaigo nga benepisyo ag kilaeahon ro kahaegahan it andang trabaho sa mga aktibidad it gobyerno sa mga komunidad.
Ro House Bill No. 502 hay tuyo nga magtao it fixed salary para sa mga barangay officials ag deklarahon sanda bilang mga regular government employees.
Mataeopangdan nga ro barangay chairman ag mga miyembro it barangay council hay nagabaton it andang sweldo paamagi eamang sa honorarium ag bukon it sangka fixed salary.
Samtang, sambilog man si Benguet Rep. Eric Yap sa mga co-authors it nasambit nga proposisyon.
