KALIBO, Aklan—Nagapanawagan makaron ro gobyerno it Haiti it blood donation para sa 2,800 katawo nga eubusang nalastruhan sa pagtama it 7.2 nga linog sa nasambit nga nasyon.
Suno kay Bombo International Correspondent Nee Fatima Sylvain it Haiti, nagapabilin nga una sa state of shock ro nasyon apisar nga naeksperyensyahan eon nanda ro makarundaya nga sitwasyon ko dag-on 2010.
Ginpahayag nga uwa it prediction ro linog kon sa siin gulpi eamang nga gin-uyog ro lugar bandang alas-8:30, sabado it agahon, oras sa Haiti.
Pila sa mga edipisyo, panimaeay, simbahan ag mga istraktura hay narumpag bangud nga bukon it masyadong matibay ro pagpatindog kara.
Ro iba pa sigon nga uwa it ikasarang sa kabuhi hay human sa eapok ro andang mga panimaeay.
Apang, maswerte gihapon sandang mga overseas Filipino workers ay uwa it nahalitan kanda ag hasta sa makaron hay uwa pa man sigon it napabalita nga missing ukon may naninahan base man sa impormasyon maghalin sa andang grupo nga filipino community.
Ro epicenter it linog hay sa Les Ecays, ap-at nga oras pa ro byahe halin sa capital town nga Port-au-Prince.
Maabo sigon ro gusto nga magbulig halin sa mga kaeapit nga syudad ag probinsya apang inde makasueod bangud nga sarado ro mga aeagyan tuga it mga debris nga narumpag ag uwa sigon sanda it mga high tech nga kagamitan nga makarescue eagi sa mga natabunan it mga nagkarumpag nga mga bato ag hollowblocks.
Sa makaron sigon hay amat-amat eon nga naga-aeabutan ro cuban doctors nga maga-asikaso sa mga ninahan nga mga residente kon sa siin kapin gid 724 ro binawian it hueam nga kinabuhi.
