KALIBO, Aklan—Bangud nga nagapangatubang it problemang pulitikal ag sosyal ro nasyong Haiti rason nga kaabuan sa mga pumeuyu hay owa pa it masyadong preparasyon para sa Paskwa makaron nga dag-on.
Madumduman nga makaron nga dag-on, ro Haiti hay gin-uyog it mabaskog nga linog rason nga maabu nga mga residente ro naduea-an it baeay.
Bangud kara, maabu man nga mga pumueuyu ro indi masyadong makaselebrar it Paskwa kapareho it andang nakasanayan.
Suno kay Bombo International Correspondent Fatima Lanciso Sylvain it nasyong Haiti nga sa pag-umpisa pa eamang it disyembre hay masako eon ro mga tawo nga naga-usoy it buhi nga Christmas Trees.
Kaabuan man sa mga pumueuyu idtu hay mga katoliko rason nga masyadong buhi ro espiritu it Paskwa.
Gina ayos ag gina-dekorahan ro andang baeay para sa bonggang handaan ag binayle kada Disyembre 24.
Pagkatapos it andang simbang gabi-i ro mga pumueuyu hay nagatipon-tipon ag nagakinasadya hasta it alas-3 it aga-aga.
Bangud kara, ro Disyembre 25 ro mismong adlaw it Paskwa hay maeanghay ro bilog nga nasyon bangud nga kaeabanan sa mga tawo hay nagapahuway hasta it Disyembre 26.
Samtang, depende man sigon sa mga kompaniya ro pagtau it mga bonuses sa andang mga empleyado bangud nga pila sa mga raya hay nakadeklara it bankruptcy sa pagtapos it dag-on.
Sa Haiti, ro Merry Christmas hay ‘Jwaye Nowel’.
Ro mga inunga hay ginapasugtan nga mag-inom it ginatawag nga ‘Anisette’, sangka alcoholic drink nga bukon it masyadong maisog.
Ro ilimnon hay halin sa ginbabad nga dahon it ‘anise’ ag rum kamana man nga ginpatam-is it asukar.
