KALIBO, Aklan – Baeantayan ro paeaabuton nga Opening Salvo it banwa it Kalibo nga hiwaton halin it Oktubre 4-6 para sa paeaabuton ni Kalibo Sr. Sto. Nino. Ati-atihan Festival 2025.
Pahayag ni Jay’Ar Arante, Head it Media Team it LGU Kalibo nga maabo ro mga ginpahaom nga aktibidades it banwa kapareho it Hala BiRUN sa pagpanguna man ni Mayor Juris Sucro bilang unang partisipante.
Maabo man nga mga partisipante halin sa nagkaeain-eain nga probinisya ag syudad sa Pilipinas ro nagdayo ag nagparehistro sa nasambitan nga marathon.
Apisar suno kana nga tapos eun ro registration period hay maabo sa gihapon ro nagamessage para nga mag-intra kanda.
Masayuran nga may mga kategorya ro nasambit nga Hala BiRUN kapareho it 5km, 10km, 21km ag 42km.
Mag-euwas sa marathon hay may una man nga dag-unan nga food festival nga ginadayo it mga bisita, turista ag mga pumueoyo.
Nagpreparar man it bisita ukon celebrity guest kapareho nanday Nik Makino,Yeng Constantino, Tom Rodriguez, ag Efrille Canonigo.
Samtang, pahayag pa ni Arante nga ginpokusan nanda ro stage sa Pastrana Park ngani nga uwa anay gintabinga ro fountain sa lugar.
