KALIBO, Aklan—Bangud sa kahilungon, nahimo nga eab-on it magueang ro anang half-brother sa Barangay Lapnag, Banga.
Ginkilaea ni P/SSgt. Danilo Dalida, imbestigador it Banga Municipal Police Station ro biktima nga si Tirso Remullo, 22 anyos, samtang ro suspek hay si Christian Seraspi, 27-anyos ag parehong residente it nasambit nga lugar.
Sa imbestigasyon it kapulisan, samtang naga-inuman ro magmaeanghud kaibahan ro iba pa nga mga amigo kat natumbahan it tuko nga kahoy ro motorsiklo nga ginapanag-iyahan it sambilog pa nanda nga igmanghud.
Sa pihak nga parte, ginpahayag it suspek nga samtang nagapa-uli hay nabatian kara nga nagwinakae ro anang manghud bangud sa natabu ag nagapang-ayat pa it inaway rason nga imaw hay napikon.
Bangud kara, ginbo-oe sigon nana ro anang espading sa andang baeay ag gin-agtunan ro biktima sa karsada ag gin-eabu it daywang beses nga tinamaan sa anang waea nga alima.
Matapos nga maagaw ro espading it andang mga igbata halin sa suspek hay owa pa nagpa-awat ro magmaeanghud ag nagdueumugan sa tunga it karsada.
Ro daywa hay parehong sa impluwensiya it aeak kat matabu ro insidente.
Matapos nga mabueong sa aklan provincial hospital hay nagdesisyon nga mag-uli ro biktima samtang ro suspek hay presenteng nakakulong sa lock-up cell it Banga PNP station.
Sa makaron hay ginahueat pa ro desisyon it biktima kon magapasaka it kasong attempted homicide kontra sa anang magueang.
Nasayuran nga owa narekober it mga otoridad ro espading nga gingamit sa krimen.
