KALIBO, Aklan–Ginaeauman it maabu nga mga football analyst nga mas magiging mainit ag makahawat-hawat ro hampang sa tunga it Argentina ag Croatia sa adlaw it Miyerkules para sa semi-finals it FIFA World Cup 2022.
Suno kay Glenn Casas, sangka football analyst nga posibleng daehon sa penalty shootout it Croatia ro hampang ag mas pang hugtan ro depensa agud nga indi makapuntos ro Argentina.
Pareho sigon nga uhaw sa kampeonato ro daywang koponan rason nga gina-ekspektar eon ro grabeng determinasyon ag pagiging agresibo it mga raya sa andang semis match.
Apang, ginapanan-aw man kara nga mas nakasentro makaron ro pressure sa Argentina eabi pa ag raya eon ro ginaeauman nga ulihing world cup appearance it football superstar nga si Lionel Messi.
Nasayuran nga nakataeana nga magtapos ro FIFA World Cup 2022 sa Disyembre 18.
