Naga-iba ro kalipay ag kasubo nga baeatyagon sa pila ka mga presenteng nagapungko nga opisyales sa barangay kasunod it hana nga pagpaiway it Barangay ag Sangguniang Kabataan Elections nga nakataeana kunta sa Disyembre 5 it presenteng dag-on.
Suno kay Kagawad Rommel Deslate it Brgy. Estancia, Kalibo, nagabatyag imaw it kalipay bangud nga bilang first termer hay madugangan ro dag-on it anang pagpanerbisyo sa andang baryo.
May kahigayunan pa sigon imaw nga maipadayon ro anang pagserbisyo sa publiko bangud nga mabahoe nga bagay ro sang dag-on.
Mag-eowas kara, may tyansa pa nga mahimong maipadayon ro anang naumpisahan kamana man mabuhinan ro anang koeba bangud nga inde malikawan nga may makwestyon sa ikasarang it sangka tawo.
Samtang, nagakasubo imaw para sa iba nga gusto man nga magpailihir sa nakataeana nga pwesto ag sa gustong magserbisyo sa baryo bangud nga hana eon man nga ipaiway ro nasambit nga eleksyon.
Madumduman nga gin-aprubahan eon it House Committee on Suffrage and Electoral Reforms ro proposisyong pagpaiway it nasambit nga eleksyon.
Sa boto nga 12-2 hay nakaeusot ro proposisyon ag napili it komite bilang bag-ong petsa para sa nasambit nga elections ro unang Lunes it December 2023.
Nagdesisyon man ro komite nga ro mga magadaog sa nasambit nga eleksyon hay maga-umpisa ro termino sa Enero 1, 2024 para sa period it tatlong dag-on.
