KALIBO, Aklan — Aprubado it Sangguniang Bayan it Malay ro sangka resolusyon nga nagadeklara kay Jessie Apolinario, bilang persona non-grata sa bilog nga banwa it Malay ag isla it Boracay.
Si Apolinario, residente it Brgy. Cayangwan, Makato, Aklan ro ginaturo nga handler it mga manakaw nga menor de edad sa isla.
Ro resolusyon hay gindihon ni Konsehal Datu Sumdad matapos mabiktima it sindikato, kun sa siin, sinueod it mga unga ro anang baeay ag gintakaw ro anang flat screen television nga ko ulihi hay nabawi sa baeay it suspek.
Ginasugid nga ginasakit sigon ni Apolinario ro mga unga nga owa nagatuman sa anang ginasugo.
Base sa resolusyon, sambilog raya sa mga nakikita nanda nga pamaagi agud nga masolusyunan ro naga-grabeng kaso it paeanakawan sa isla nga ginaeakutan it mga menor de edad.
Samtang, plano man makaron it konseho nga magdihon it ordinansa nga ro tanan nga mga maeakot sa panakawan sa Boracay hay ideklarang persona non-grata agud nga indi eon uman nga makasueod sa isla.
