KALIBO, Aklan—Nagpueong ro lokal nga gobyerno it Kalibo kaibahan ro nagkaeain-eain nga komitiba agud nga talakayon ro iba pang mga kinahangeanon para sa mabuhay eon nga ginahandum nga maging siyudad ro banwa.
Suno kay Kalibo mayor Emerson Lachica nga sa nasambit nga pueong hay nagbilog sanda it sangka technical working group agud nga plantsahon ro mga requirements para sa cityhood bid.
Nauna eon suno kana nga nagbaeay it resolusyon ro Sangguniang Bayan nga nagahinyu sa Kongreso angot kara sa bulig ni Aklan 1st district congressman Carlito Marquez.
Gindugang pa ni mayor Lachica nga tuyo it andang handum nga maabot ro mas pang pag-umwad it banwa ag mapataas ro lebel it pagdumaea sa lokal nga gobyerno.
Sambilog suno kana sa mabahoe nga benepisyo kara hay mapataas ro internal revenue allotment ukon IRA it Kalibo.
Nagaeaum man ro alkalde nga magiging paborabli kanda ro resulta it bag-o eamang natapos nga census nga nagakinahangean it 150,000 nga mga residente agud nga ma-qualify bilang siyudad sandig sa laye.
Nasayuran nga ko 2015 census, ro Kalibo hay may populasyon eamang nga masobra sa 83,000 nga residente.
Posible man sigon nga mataw-an it konsiderasyon ro land area bangud sa pag-angkon it Kalibo it daywang island barangay.
Base sa Republic Act No. 9009, agud nga maging siyudad ro sangka banwa, dapat nga may populasyon nga kapin sa 150,000, may land area nga kapin sa 100 square kilometers ag minimum nga P100 million nga average nga kita kada dag-on sa sueod it magkasunod nga dag-on.
Mag-eowas sa Kalibo, ginaduso man ro banwa it malay nga maging siyudad.
Engkaso nga magmadinaeag-on antes nga matapos ro dag-on 2021, posibleng pagatawgon ro Kalibo bilang Ati-atihan City of Kalibo.
