Nabuking ro sangka bar sa Pasay City nga ginapatihan nga nagabaligya it lobo nga may sueod nga peligrosong kemikal nga nagatuga it makadali nga pagka-“high” it sin-o man nga makasinghot kara.
Ginsueod it mga tawuhan it National Bureau of Investigation (NBI) ro bar matapos matumod sa surveillance ro paggamit it lobo nga may sueod nga nitrous oxide.
Suno sa NBI, ro nitrous oxide hay nagatuga it makadali nga kasadyahan ag eubus nga delikado para sa mga magasinghot kara nga posibleng magresulta sa kamatayon.
Raya sigon makaron ro bag-ong modus it mga sindikato it ilegal nga droga nga ginagamit bilang party drug.
Nakit-an sa stock room it bar ro pilang tangke it nitrous oxide ag mga lobo nga ginkumpiska it mga awtoridad.
Plano eon it NBI nga irekomenda sa Dangerous Drugs Board (DDB) nga ilinya bilang dangerous drug ro nitrous oxide sa idaeum it Republic Act 9165 para mapugngan ro pagkalhit it paggamit kara.
Ginpasakaan eon it NBI it kaso ro tag-ana it establisimyento, manager it club kamana man ro mga nagabaligya.
