Maabu ro nakibot sa hirit it Department of Trade and Industry (DTI) nga may sinsilyo pa ro P500 pesos nga budget sa Noche Buena.
Raya ro ginpamilit it DTI matapos ro andang paglibot sa mga baealigyaan.
Suno pa sa ahensya, kinahangean eang it diskarte sa pagpamakae.
Bastante man sigon ro P500 pesos agud nga makabakae it mga nagapangunang baeak-eon sa adlaw adlaw nga pagkaon.
Matuod nga may maabot ro P500 pesos nga budget ag matuod man nga masabat kara ro pang-Noche Buena it sangka bilog nga pamilya.
Apang makasueubo nga matsa manaba ro pagtan-aw it gobyerno sa mga ordinaryong pamilya sa mga makarondaya nga klaseng pagsaeo-saeo kapareho it Noche Buena.
Posibleng owa nagasaka ro lebel it pagpangabuhi it mga pigado hay bangud nga ro gobyerno mismo ro nagapugong kara.
Tama eon ro pagpakuno-kuno nga para sa pigado.
Owa dapat nga ginakundisyon ro utok it tawo nga batunon ro kamatuoran nga pobre eang ag indi dapat nga mag-umwad.
Ro pagkaon hay bukon it luho, raya hay kinahangeanon.
Indi man kinahangean nga maghandum it magarbo ukon sobra-sobrang handa bangud sa matuod eang, adlaw adlaw man nga naga antus sa owa it pundo nga pagtaas sa presyo it mga baeak-eon.
Ro hangkat makaron sa mga opisyal it gobyerno , masarangan baea ninyo nga maghanda it Noche Buena ukon magpatigayon it party sa balor nga P500 pesos ag dayun ninyo nga hambaeon nga may sinsilyo pa nga mabo-oe.
