KALIBO, Aklan–Haom eun ro igatao nga covid-19 health kits it lokal nga gobyerno it Kalibo para sa mga magapositibo sa covid-19.
Suno kay Executive Assistant to the Mayor Mr. Basil Tabernilla hay nag level-up ro ginapanupod nga ayuda para sa mga symptomatic ukon asymptomatic nga pasyenteng nagpositibo sa nasambitan nga sakit.
Ro sueod it covid-19 health kits hay ro digital thermometer, lozenges, vitamin C, paracetamol, face mask ag alcohol.
Samtang, ginapanan-aw man nanda ro posibilidad nga madugangan pa it oximeter ro sueod it nasambitan nga health kits.
Sa pihak nga parte, sambilog pa sa mga programa it banwa agud nga sok-ean ro pandemya hay ro nakataeana nga pagtukod it primary health care facility.
Suno kay Tabernilla nga ko Enero 7 pa it presenteng dag-on hay natapos eun it LGU ro tanan nga mga requirements para sa igatukod nga proyekto.
Ko nagtaliwan nga adlaw eamang kat anda eun nga nabatun ro permit to construct.
Sa makarun hay una eun raya sa bidding ag masunod kara hay maga-umpisa eun construction.
