Gin-aprubahan it Regional Tripartite Wages and Productivity Boards (RTWPB) ro P33 pesos nga dugang nga sweldo it mga trabahador sa Metro Manila.
Sa Wage Order No. NCR-23, ro magiging minimum wage para sa trabahador sa non-agriculture sector hay P570 ag P533 para sa agriculture sector.
Ro bag-ong wage order hay magiging epektibo 15 diyas matapos nga ma-publish sa mga peryodiko nga may maeapad nga sirkulasyon.
Ro ulihing wage order nga gin-isyu para sa mga trabahador sa pribadong establisimento sa NCR hay ko Nobyembre 22, 2018.
Ro dugang nga P33 pesos hay ginsug-aeaw it batikos it mga obrero.
Suno sa mga trabahador, siin maka abot ro dugang nga P33 pesos.
Owa eon sigon it mabakae sa raya nga kanaba nga kantidad bangud nga ro inflation rate ko nagtaliwan nga Abril sa NCR hay nagsaka eon sa 4.4 percent ag sa guwa it Metro Manila hay 5.1 percent.
Sang adlaw matapos nga aprubahan ro wage order, gin aprubahan man it Department of Trade and Industry (DTI) ro dugang nga presyo sa mga nagapangunang baeak-eon.
Gina-abangan pa makaron ro ginahinyu it transport groups nga dugang nga pamasahe.
Owa eon sigon it ginakita ro mga drayber it PUVs bangud sa owa it pundo nga oil price hike.
Maga-roll back it sangkiri ro oil companies ag sa masunod hay pagabawi-on it uman.
Kapit sa patalim ro mga pigado nga apektado it padayun nga pagtaas sa presyo it mga baeak-eon samtang naaywan man ro andang suweldo.
Owa eon it mabakae sa sangkiri nga sweldo.
Kabay nga mataw-an raya it solusyon it masunod nga bag-ong gobyerno.
