Balitang Espesyal——-Naging praktikal ro mga opisyal it Sragen Regency sa Central Java Indonesia kat andang gamiton ro sangka abandonadong baeay, nga kilaea sa lugar nga gina istaran it mga moeto, bilang pasilidad nga pagabutangan it mga residenteng maga eabag sa andang 14 day self isolation policy.
Suno kay Sragen Regent Kusdinar Untung Yuni Sukowati, owa sanda it budget agud nga magpatindog it pasilidad sa andang lugar rason nga ro mga abandonadong baeay eon lang ro andang ginagamit bilang quarantine facility.
Bangud sa kahadlok nga makulong sa haunted house, naging epektibo raya nga pasundon ro mga residente eabi eon ro mga trabahador nga naga uli halin sa mga mabahoe nga siyudad nga maabung kaso it COVID-19.
Umpisa nga gintaeana nga pasilidad ro sangka abandonadong haunted house nga ginapalibutan it kaeanasan, tatlong residente eamang ro nadakpan nga nag-eabag sa mandu.
Maskin nga owa man it nasaksihan nga mga moeto, nagbuhay eamang it pitong araw ro tatlong nadakpan nga residente bangud nga nagapakitluoy ro mga raya nga sanda hay pahilwayon eon bangud sa psychological torture nga andang na-eksperyensiyahan .
Nagapati ro village chief nga si Mulyono nga nakabulig ro paggamit sa haunted house sa pagpanaba it kaso it COVID-19 sa andang lugar bangud nga owa man it nadakpan pa nga nag eabag sa andang mandu.
