KALIBO, Aklan—Ginpabugae ni Altavas mayor Denny Refol nga hugut nandang ginapatuman ro health and safety protocols kontra COVID-19 rason nga na-kontrol nanda ro pag-abo it kaso.
Suno kana, haeos tanan nga mga pumueoyo hay nagasunod sa mga minimum health standards kung sa siin makita sigon ro kooperasyon it kada pumueoyo.
Maeuwas kara, sarang man sigon it Altavas nga magbaton it kapin sa 50 nga Locally Stranded Individuals (LSIs) ag Returning Overseas Filipinos (ROFs).
Ro 40 sigon sa mga pasilidad hay ginataeana para sa mga LSI samtang ro napueo hay para sa mga ROFs.
Dugang pa kara nga ro quarantine facility paeang it andang banwa ro na-accredit it Philippine Health Insurance Corporation (Philhealth) sa bilog nga probinsya it Aklan.
Bangud kara, ro mga naga-uli nga ROFs ag nagapaidaeom sa 14 day mandatory quarantine hay ginabayran it Philhealth.
Ro kada ROF suno kana nga makatapos it andang quarantine period hay ginabayran it state health insurer it kapin sa 24, 000 pesos.
Raya man sigon ro ginagamit nga kwarta it lokal nga gobyerno para pondohan ro andang mga naga-uli nga kasimanwa.
Sa pihak nga parte, ginpaathag man ni Mayor Refol nga owa it matabo nga selebrasyon para sa andang kapyestahan sa maabot nga Enero 21 hasta 22.
Apang, may ginpahaum sigon sandang aktibidad para sa pagpasaeamat ag pagtao it dungog sa mga frontliners ag pilang religious activities.
