KALIBO, Aklan—Ginapadahan it mga eksperto ro publiko kontra sa mga sakit nga pwedeng mabo-oe sa kada tag-init eabi eon makaron nga naeksperyensiyahan ro El Niño phenomenon sa nasyon.
Sa interview it Bombo Radyo, ginpahayag ni Dr. Philip Ian Padilla, sangka public health expert nga kaeabanan sa mga pwedeng maeksperyensiyahan hay ro heat stroke ukon heat exhaustion nga makabig nga peligroso ag makamaeatay.
Mag-eowas kara, pwede man nga makaangkon it dehydration, partikular sa mga senior citizen ag sunburn.
Bangud kara, pirme sigon nga mag-inom it tubi ag likawan ro sobrang exposure sa init it adlaw.
Ginpahayag pa ni Dr. Padilla nga siguraduhon nga malimpyo ro tubi nga gina-inom para makalikaw sa iba pang sakit kapareho it typhoid, cholera, hepatitis A ag iba pa.
Sa pihak nga parte, nagpaandam man imaw sa padayun nga pagtaas it kaso it dengue bangud nga gusto sigon it namok eabi eon ro mga adult mosquito ro mainit nga paniempo.
