KALIBO, Aklan—Kadungan it padayon nga pagsaka it kaso it COVID-19 sa probinsiya it Aklan, naalarma eon ro mga opisyal ag mga eksperto.
Suno kay Dr. Cornelio ‘Bong’ Cuatchon Jr. it Provincial Health Office ukon PHO-Aklan nga maka-alarma eon ro pagtaas it COVID-19 cases sa nagkaeain-eain nga banwa sa probinsiya.
Umpisa Hulyo 18, 2021 suno kana hay nagsaka ro average daily attack rate ukon ADAR kun sa siin owa naganaba sa 140 ro kaso kada adlaw.
Makabig man sigon nga record-breaking ro nailistang 217 ko adlaw it Huwebes.
Sa 390 nga ginpaidaeum sa RT-PCR test hay 217 ro nagpositibo sa deadly virus ukon may positivity rate nga 55.6%.
Mag-eowas kara, haeos punuan eon ro mga ICU ag COVID wards it Aklan provincial hospital ag iba pang mga pribadong ospital.
Bangud sa sitwasyun, nag-commit suno kana ro Department of Health nga magadugang it kapin sa 10 nga mga doktor, 20 nga mga nurses ag limang medical technologists agud nga mas pang mapabaskog ro health care capacity sa probinsiya sa pagsukoe sa coronaviruss.
Uman nga nagpanawagan si Dr. Cuatchon sa publiko nga makipagbueuligan agud nga matapna ro transmission it sakit pinaagi sa hugut nga pagsunod sa minimum public health standards ag indi maging kampante maskin nga fully vaccinated eon ag engkaso nga mag-abot ro bastante nga bakuna hay magpaturok gid.
Eubus pa kara nga ginapadahan ro mga pumueuyu matapos nga makalista it mga bag-ong variant ukon mutation it virus sa Aklan partikular ro Beta ag Philippine variant ukon P.3.
Nagapanguna makaron ro Aklan sa bilog nga Western Visayas sa may pinakamaabu nga kaso nga may kabilugan nga 7,613.
Sa nasambit nga numero, 1,800 ro aktibong kaso ag 95 eon ro namatay.
