Makabig nga maja gina-eaha sa sueod it sangka oven ro na-eksperyensyahan nga grabe kainit it panyempo sa nasyong Europe ag iba pang kaeapit nga nasyon kara.
Suno kay Bombo International Correspondent Remy Resta it Spain nga umpisa ku nagtaliwan nga Lunes , Hulyo 11 asta Biyernes , Hulyo 15 ga abot sa masobra 40 asta 47 degrees celcius ro na-eksperyensyahan it mga pumueuyo nga temperatura sa Europe bangud sa ginapatihan nga heatwave.
Kung siin nagresulta man it maeapnagon nga wildfires ag kamatayon sa pilang ka mga pumueuyo sa Europe.
Bangud sigon sa grabe nga kainiton, ginbawaean it gobyerno nga magguwa ro mga pumueuyo sa andang mga panimaeay partikular sa mga senior citizen eabi eon gid kung bukon man it imporatante ro ginapanawan.
Ro nasambit nga heatwave hay kada dag-on man sigon nga nagapaeanasa sa andang nasyon ag kaeapit lugar apang raya nga dag-on ro makabig nga pinakamalala.
Mataeopangdan nga indi magnaba sa 360 katawo ro patay sa Spain ag indi man magnaba sa 238 ro patay sa kaeapit karang nasyon nga Portugal bangud sa grabe nga heatwave.
Samtang, suno man sa mga eksperto, ro nagalala nga climate change ro ginapatihan nga rason it nasambit nga heatwave.
