KALIBO, Aklan — Nagpamalibad nga magkomento ro mga empleyado it Henann Group of Resorts sa napabalitang peke ro andang environmental compliance certificate (ECC).
Naabutan it Bombo Radyo ro pila sa mga empleyado kara nga nagalimpyo ag naghambae nga uwa sigon sanda it ideya kaangot kara.
Nauna eon nga ginpasiguro it Department of Environment and Natural Resources (DENR) nga magapangatubang sa nagakaigong kaso ro resort kon mapamatud-ang ginpeke ro andang mga dokumento.
Ginasugid nga ro pekeng ECC hay ginpaguwa ko Oktubre 8.
Nasayuran nga bukon it kaibahan ro limang resorts it Henann sa 68 establisimentong gintaw-an it “go signal” it Department of Tourism nga maka-operate sa Boracay reopening sa Oktubre 26.
Ginsuspinde ni Environment Secretary Roy Cimatu ro tanan nga ECCs sa Boracay ko buean it Hulyo it presenteng dag-on agud ma-obliga ro mga business owners nga makasunod sa mga requirements ag ko Oktubre 5 eamang hay ginduea eon ro suspension para sa tanan nga mga compliant establishments.
Samtang, nauna eon nga ginpahayag ko pamunuan it Henann nga uwa sanda it ginmanduan nga magsumite it mga pekeng dokumento para sa andang kompaniya.
