KALIBO, Aklan — Ginpadumdum ni P/Capt. Gilbert Batiles, hepe it Lezo Municipal Police Station ro publiko nga indi basta-basta nga magpati sa pilang mga indibidwal nga nagapakuno-kuno bilang imaw agud nga makapang-solicit.
Suno kana nga nakibot imaw ag nadismaya sa nabalitaan nga ginagamit it owa pa nakilaea nga mga indibidwal ro anang pangaean sa mga bukon it rasonabli nga solicitation gamit ro sangka cellphone number nga owa nana ginapanag-iyahan.
Modus sigon it suspek nga nagatawag sa pilang office head it munisipyo it Lezo ag naga-solicit it bueong ag bugas.
Ko nagtaliwan nga adlaw, sangka nagpakilaeang P/Capt. Batiles ro ginasugid nga nagtawag sa head it Municipal Health Office ag gina-alegar nga nagapangayo it referral letter para sa mga pharmacy sa pag-angkon it kinahangeanon nga mga bueong para sa medical mission it Lezo MPS.
Kat owa eagi sigon nagpasugot sa anang gina-demand hay naakig ro caller ag ginbuyayaw ro doktor nga head it MHO.
Pagkamasunod nga adlaw, gamit ro kapareho nga modus, gintawagan man ro sangka empleyado it treasurer’s office ag naga-demand it bugas.
Sa kamatuoran suno kana hay nag-agto sa andang police station ro nasambit nga empleyado it treasurer’s office ag ginhana imaw nga komprontahon, apang kat maka-istorya imaw it personal hay naklaruman man ro nasambit nga opisyal it munisipyo.
Ginpamilit ni P/Capt. Batiles nga owa imaw nagapatigayon it solicitation ukon nagapangayo it maskin anuman sa maskin kanyo rason nga pinaagi sa ginpaguwa nanda nga public awareness, ginlaygayan nana ro publiko nga maging mausisa sa andang mga ka-transaksyon agud nga indi mabiktima it pagpangloko.
Sa pihak nga parte, sa bulig it Regional Anti-Cybercrime Unit it Philippine National Police hay una sa pa sanda sa proseso sa pagtumod sa pagkatawo it suspek pinaagi sa pag-trace sa pangaean it naka-register sa cellphone number nga gingamit nga gina-alegar nga sangka Aklanon man.
