KALIBO, Aklan—Umpisa ko Nobyembre 18 hay naging epektibo ro pagpungko sa pwesto ni P/Lt. Col. Jonathan Pa-ac Pablito sa Malay Police Station kabaylo ni P/Major Jess Baylon.
Suno kay P/Lt. Col. Joem Malong, tagapaghambae it Police Regional Office (PRO)-6, bangud nga ro Malay PNP nga may hurisdiksyon sa isla it Boracay hay makabig nga sangka special police station ag ro banwa hay sangka first class municipality rason nga nagakinahangean it opisyal nga may ranggo nga Police Lt. Col.
Si Baylon suno kana nga bag-ong naghalin sa schooling sa Korea hay naka-assign makaron sa Regional Personnel Holding and Accounting Unit it PRO-6 sa Iloilo City matapos magserbisyo sa Malay PNP sa sueod it limang buean umpisa ko Hunyo 2019.
Nasayuran nga dati man imaw nga naka-assign sa PRO-6 bilang aide-de-camp ni dating regional director P/Brigadier John Bulalacao daywang dag-on eon ro nagtaliwan.’
Gindugang pa ni Malong nga si Lt. Col. Pablito hay dating station commander it Iloilo City Police Station 1 ag naging hepe man it Strategy Review Branch it Regional Police Strategy Management Unit sa Iloilo nga nagadumaea sa pagpatuman it PNP Patrol Plan 2030.
Nauna eon nga ginpahayag it bag-ong hepe it malay PNP nga plano nana nga ipatuman ro internal cleansing ag SMART policing sa bag-ong assignment.
Kaibahan sigon kara ro pagbutang it mga CCTV cameras sa Boracay ag pagpatindog it command center kontra sa kriminalidad ag agud nga insigidang maka responde sa anumang emerhensiya.
