KALIBO, Aklan — Gin taw-an it medalya ro kamayad ni si P/SInsp. Honey Mae Ruiz, hepe it Kalibo Police Station bangud sa pagka-aresto sa sangka miyembro it notoryus nga acetylene gang sa Kalibo, Aklan.
Sambilog eamang si Ruiz sa iba pang chief of police nga gin taw-an it pasidungog it Police Regional Office (PRO)-6 nga pinangunahan ni director P/CSupt. Cesar Hawthorne Binag nga may kaangtanan sa pag amlig sa seguridad sa pag abot it mga delegado it ASEAN summit.
Kaeakip pa sa nataw-an it award ro iba pang pulis it Kalibo Police Station nga rumesponde ag nakaaresto sa gina turong responsabli sa sunod-sunod nga pagpanakaw sa mga apartment.
Nasayuran nga ro akusadong si Glenn Alvin Orille kaibahan ro misis nga si Maria Evelyn Orille hay nadakpan it mga pulis kaeakip ro sangka granada kamana man ro mga gin panakaw nga alahas, gadget ag iba pang mga branded nga gamit nga naga balor it haeos tunga sa milyong pisos pilang dominggo bago ro Kalibo Sto. Nino Ati-Atihan Festival.
Si Orille hay may naka-pending nga mga kaso sa NCR ag Luzon bangud sa kaparehong kaso.
