KALIBO, Aklan—Aminado ro Provincial Health Office ukon PHO-Aklan nga posibleng mag-abot hasta sa unang quarter it 2022 antes nga maabot it Aklan ro herd immunity kontra Coronavirus Disease (COVID-19).
Suno kay Dr. Cornelio Cuachon Jr. it PHO-Aklan nga sigidas eon ro pag-aeabutan makaron it mga bakuna sa probinsiya.
Sa sueod sigon it haeos waeong buean nga pagbakuna nga umarangkada ko marso 10, haeos 128,148 pa eamang ro fully vaccinated ukon 29.96% it 70% it target nga it population ro nakakumpleto it required nga 2 doses it COVID-19 vaccines.
Samtang kapin sa 215,725 nga Aklanon ukon masobra sa 50.68% it target nga populasyon ro nakabaton it unang dose it bakuna.
Mas pa sigon nga ginpaeapad makaron ro vaccination roll-out kun sa siin, ro provincial government ag iba pang mga LGUs hay nagabaton eon it walk-in nga nagakahueugan nga bastante eon ro supply it bakuna.
Sa pihak nga parte, nag-abot sa 655 ro mga unga nga may comorbidity ro nabakunahan kontra COVID-19 sa Aklan nga gin-umpisa ko biyernes nga adlaw sa aklan provincial hospital.
Sa makaron hay gin-umpisahan eon ro online registration para sa pagbakuna it general pediatric population ukon ro mga unga nga naga-edad it 12 hasta 17 nga owa it comorbidity.
