KALIBO, Aklan—Ginkumpirma ni Aklan Provincial Administrator Selwyn Ibarreta nga uman nga ginpasugtan nga magbalik-operasyon ro sangka high-end hotel sa isla it Boracay matapos nga suspindihon ro andang operasyon it limang adlaw.
Raya hay kasunod it pagpositibo it 15 nanda nga mga empleyado sa covid-19.
Apang suno kay Atty. Ibaretta nga owa eon ginpatapos ro limang adlaw nga temporary closure bangud nga pagkatapos it daywang adlaw hay uman raya nga ginpasugtan nga mag-operate matapos nga makita nga hugut man nanda nga ginasunod ro gintaeana nga health and safety protocols para sa andang mga staff ag guests.
Mag-eowas kara, temprano man nanda nga natapos ro paglimpyo ag dis-infection.
Posibleng sa hin-aga nga adlaw it Biyernes pormal nga magabukas ro nasambit nga hotel.
Nauna kara, nagpatigayon it mass testing ro Provincial Health Office ukon PHO-Aklan, Department of Health ag MHO-Malay sa tanan nga mga empleyado it hotel nga gin-umpisahan ko nagtaliwan nga Disyembre 26, 2020.
