Sangka 16-anyos nga high school student sa South Korea ro gin-akusahan nga sapilitan kara nga tinattooan ro anang daywang kaklase nga pilang dag-on eon nana nga ginu-bully!
Ginkumpirma it Incheon Nonhyeon Police Department nga presente nanda nga gina imbestigahan ro sangka kaso kun sa siin sapilitan nga pagbutang it tattoo it sangka notorious high school bully sa daywang teenager para pagpraktisan ro mga raya.
Nagpasaka it reklamo ro ginikanan it unang biktima ko Marso matapos nanda nga aksidenteng makita sa siki it andang unga ro sangka isdang tattoo nga pangit ro pagka-obra.
Kat ginkompronta ro 15-anyos nga unga, gin aku nana nga sapilitan imaw nga gintattooan it sangka schoolmate nga daywang dag-on eon imaw nga gina bully.
Sa panaysayon it unang biktima, ginpaeag ag ginpilit imaw nga magsunod sa sangka motel sa Incheon ko Oktubre 2022.
Samtang sa motel, gin-bugbog imaw ag sapilitang ginbutangan it tattoo sa siki nga may habang 22cm.
Matapos magkalhit ro balita angot kara, may ikaywang biktima nga nakaangkon man it kabaskog it buot nga maghambae kontra sa suspek.
Suno sa ikaywang biktima, sapilitan man imaw nga ginbutangan it tattoo sa dughan, abaga ag butkon.
Maskin nga nagreklamo eon sa pulis ro mga ginikanan kara, owa nagpundo ro suspek sa pagpang-bully.
Ro biktima hay ginhadlukan eon nga magsueod sa eskwelahan.
Ginpamalibaran it suspek ro mga akusasyon kana.
Suno pa sa ginikanan it suspek, nagapati sanda sa andang unga nga owa pag pamilit nga natabu bangud nga imposibleng ipilit sa sangka tawo ro tattoo procedure.
Sa makaron, ginkasuhan ro bully it grave coercion ag pageabag sa medical law sa South Korea kun sa siin lisensiyadong doktor eamang ro pwedeng magbutang it tattoo.
Ro multa sa maga-eabag hay 50 million won ag daywang dag-on nga pagkakulong.
