KALIBO, Aklan—Ginaboeobanta nga kapin sa P520,000 nga balor it ginadudahan nga shabu ro nabo-oe sa sangka ginakabig nga ‘high value target’ sa ginkasa nga buy-bust operation it Philippine Drug Enforcement Agency (PDEA)- Aklan, Lunes it agahon, Mayo 6, sa Purok 7, Barangay Tigayon, Kalibo.
Ginkilaea ni PDEA Agent V Nicolas Gomez ro naaresto nga si Glen Deslate, 40-anyos, residente man it nasambit nga lugar nga dati eon nga nakulong it haeos 13-anyos sa New Bilibid Prison bangud sa pagbaligya it ilegal nga droga.
Nabo-oe sa naarestong suspek ro sangka pakete it ginadudahan nga shabu sa ginpatigayon nga buy-bust operation nga nagabalor it P20,000 ag dugang nga waeo nga mga mabahoe nga pakete it ginadudahan nga shabu nga ginaboeobanta nga may street value nga P500,000 ag iba pang drug paraphernalia.
Suno kay Gomez si Deslate hay ko nagtaliwan nga dag-on eamang nakahilway matapos nga maaresto sa Isla it Boracay angot sa pagbaligya man it droga.
Gina-alegar nga ro iligal nga droga hay halin sa New Bilibid Prison ag gina-deliver sa anang baeay.
Estratehiya suno kana it mga nagaduso it droga nga ipa-circulate raya sa market sa mas manaba nga presyo agud nga madasig nga maubos.
Nagapangatubang eon man ro suspek sa kasong pageabag sa Republic Act 9165 ukon Comprehensive Dangerous Drugs Act of 2002.
Samtang, hugut nga ginpamalibaran it suspek nga imaw ro nagapanag-iya sa mga narekober nga iligal nga droga ag gin-insister nga sa korte eamang nana pagadepensahan ro anang kaugalingon.
Dugang pa nana nga acquitted imaw sa dating kaso.
Nakadetine makaron sa custodial facility it Kalibo Municipal Police Station ro suspek samtang igapaidaeum sa chemical analysis ro mga nakumpiskang ebidensya sa Capiz Provincial Crime Laboratory kamana man nga drug test sa suspek.
