May nailistang pagtaas it kaso it COVID-19 sa Metro Manila ag iba pang lugar sa nasyon, suno sa report it Department of Health (DOH) ko Miyerkoles.
Ginatun-an kon dapat nga ibalik sa Alert Level 2 ro National Capital Region (NCR).
Gina-monitor it DOH ro admission it mga pasyenteng may COVID sa mga ospital.
Ro pag abu it kaso hay nagapamatuod eamang nga iya pa sa palibot ro COVID rason nga indi dapat maging kampante ro pumueuyu.
Ginpahayag it OCTA Research Group, posibleng madugangan ro kaso antes nga matapos ro Hunyo.
Ro OCTA man ro naghambae ko Mayo nga posibleng mag-abu ro kaso pagkatapos it election.
Hugut nga ginapadumdum it DOH sa publiko, padayun nga magsunod sa health protocol nga ginapatuman it Inter-Agency Task Force for the Management of Emerging Infectious Diseases.
Kon pagabalewalaon ro mandu kapareho it owa pagsuksok it face mask, pagtumpok-tumpo ag owa paghugas it alima, posibleng uman nga magataas ro kaso.
Suno sa DOH, importanteng sundon ro mga ginamandu agud nga indi magkalhit ro virus.
Indi dapat nga tuearon ro mandu ni Cebu governor Gwendolyn Garcia nga puwede eon nga indi mag-face mask sa guwa it baeay ukon sa mga lugar nga open ag may mayad nga bentilasyon.
Imaw ro unang local government official nga nagkontra sa mandu it IATF.
Masyadong temprano pa para sa eubusan nga pagbo-oe it face mask.
Kon maging optional eon ro pagsuksok it face mask, mabahoe ro posibilidad nga matuead ro Pilipinas sa ibang nasyon nga matapos maghaeuga hay uman nga nag abu ro kaso.
Indi magmadali sa pagbo-oe it face mask.
Ro mayad nga obrahon it local officials hay engganyuhon ro nasakupan nga magpabakuna ag magpa-booster shot.
Raya ro importante agud nga maprotektahan ro pumueuyu sa bangis it COVID ag variants kara.
Ano ro mas manami, buhi ro negosyo ukon nagapang-eapaw ro mga ospital bangud sa kaabuon it may COVID?.
