KALIBO, Aklan—Ro Human Immunodeficiency Virus (HIV) hay puweding magresulta sa kamatayon.
Raya ro naga-atake sa immune system agud nga malisdan ro eawas it sangka tawo nga sok-ean ro mga impeksyon.
Kung raya hay magsueod sa sangka host, ginapahina it HIV ro immune system pamaagi sa pag-atake sa mga cells nga ginahimo it kaeawasan agud nga sok-ean ro nagkaeain eain nga klase it impeksyon.
Samtang ro AIDS man hay magkaiba sa HIV.
Ro acquired immunodeficiency syndrome (AIDS) hay sangka sakit nga naeskperyensiyahan kung mag-grabe eun ro impeksyong daea it HIV.
Suno kay Mr. Errol Ordines it Philippine Red Cross- Aklan Chapter, nga kung indi mabueong ro mga tawong may HIV sa ulihi hay posibleng makaangkon raya it AIDS ag sambilog sa masobra sa 20 nga mga kanser nga naga-atake man sa nagahina nga immune system.
Ro pilang ka mga tawo nga may HIV hay puweding indi magpakita it maskin anong sintomas sa unang pilang buean matapos ro impeksyon.
Samtang ro iba man hay puweding maka eskperyensiya it mga sintomas it trangkaso kapareho it eagnat, sakit it ueo, hives ukon skin rashes, ag sore throat.
Kung mag-grabe eun ro sakit, puweding maghaeok ro mga lymph nodes, magnaba ro kilo, perming paghingko ag pag-ubo.
Samtang gina-atake it HIV ro immune system it kaeawasan, ro mga pasyente hay madaling tapnan it mga sakit kapareho it tuberculosis, cryptococcal meningitis, mga impeksyong daea it bakterya ag pilang mga kanser kapareho it lymphomas ag Kaposi’s sarcoma.
Puweding masayuran it sangka tawo ro anang HIV status pamaagi sa pag-eksamin sa anang dugo nga maka-detect it virus ukon mga antibodies kontra sa virus.
Nagaguwa ro makarondaya nga mga sintomas umpisa sa isaea hasta tatlong dominggo pagkatapos nga ma-expose sa HIV.
Nasayuran nga ro HIV hay napapasa tawo-sa-tawo sa kada nakikipaghieawas nga owa nagagamit it condom, pagsaylo it dugo, sa pagtuslok it dagom ukon nakikigamit it syringe sa sangka tawong na-eksamin nga positibo sa HIV.
Sa mga pili eamang nga kahigayunan , naipasa man it mga nanay ro HIV sa pag-unga kung may HIV ro nanay ukon nagapasusong ina.
Sa makarun hay owa pa it bueong para sa HIV.
Rason nga agud malikawan ro nasambitan nga masakit hay dapat masayuran ro tamang paggamit it kondom kung nakikipag sex ag gilayon nga magpakonsulta sa doktor kung may nabatyagan nga mga sintomas.
