KALIBO, Aklan–Ginsuhestiyon it hog raisers association sa probinsya it Aklan nga makaangkon it hugut nga pagbantay sa mga border.
Raya hay kasunod it mas pag-eapit it paeag it African Swine Fever (ASF) kung siin may una eon nga nailistang kaso sa probinsya it Iloilo ag Capiz.
Suno kay Engr. Jun Agravante, presidente it hog raisers association sa probinsya it Aklan nga mabahoe ro posibilidad nga masudlan kita it ASF makaron nga dag-on bangud masyadong madasig ro pagkalhit it virus.
Agud nga malikawan ro pagkalhit it infection sa mga alagang baboy, dapat sigon nga magpatuman ro mga natungdan nga ahensya it gobyerno it hugut nga border control.
Inspekyunon ro mga naga-agi nga saeakyan eabi eon ro may kargamento para masiguro nga euwas ro gina-transport nga karne ukon frozen meat products.
Kamana man nga ipaidaeom sa disinfection ro mga truck ukon delivery van nga nagasueod ag nagaguwa sa Aklan.
Ginlaygayan man kara ro mga hog raisers nga insigidang magreport sa Office of the Provincial Veterinarian (OPVET) engkaso nga makitaan it sintomas it ASF ro alagang baboy.
Pila sa mga nagapangunang sintomas kara hay ro pagpamuea it panit, kawad-an it gana sa pagkaon ag pagpang-euya.
Ro mga baboy sigon nga infected it ASF hay nagakamatay sa sueod it tatlo hasta napueong adlaw.
