KALIBO, Aklan—Uwa gin-eauman it federation of livestock, hogs and poultry raisers ro mabahoe nga epekto it African Swine Fever ukon ASF virus nga tumama pitong ka banwahanan sa bilog nga probinsya it Aklan.
Ginpahayag it presidente it pederasyon nga si Jun Agravante, eubus nga nagakasubo ag nagakahadlok ro mga hog raisers sa presenteng sitwasyon bangud nga mabahoe ro naging impact it virus sa andang pangabuhian.
Angot kara, nagnubo sa P120 pesos ro baeak-eanay it buhi nga baboy nga mas pang nagpalugi sa mga hog raisers.
Bangud kara, nag-apela sanda sa gobyerno nga makaangkon it alternative livelihood program para kanda.
Sa raya nga pamaagi suno kana hay may alternatibong pangabuhian ro mga apektadong hog raisers.
Ginadiscourage man it pederasyon ro mga miyembro nga inde anay mag-alaga it baboy sa baylo nga magpokus ro mga raya sa iba pang pagakitaan kaparehas sa pag-alaga it mga broiler nga manok, pantat ag tilapia.
Ginpahayag dugang ni Agravante nga mas mayad ro ginhimo nga tikang it gobyerno nga ginpaidaeom sa state of calamity ro probinsya agud nga may mahueag nga pondo para iayuda sa mga apektadong hog raisers.
Hinyo nanda sa provincial government nga kon may kompensasyon para kanda hay padasigan ro pagproseso agud nga mapasaalima it mga apektado nga maging katiaan sa andang pag-umpisa it uman sa andang pangabuhian.
