KALIBO, Aklan — Nagnaba it 28.24% ro mga crime incidents sa bilog nga Western Visayas umpisa ko Disyembre 16, 2024 hasta Enero 1, 2025 .
Sa interview it Bombo Kalibo, ginpahayag ni P/Lt. Col. Arnel Solis, tagapaghambae it Police Regional Office (PRO)-6 nga kapin sa 907 nga insidente it krimen ro nailista kumpara sa 1,264 nga insidente sa kaparehong period ko nagtaliwan nga dag-on ukon nagnaba it 357 incidents.
Dugang pa nga nagnaba it 122 incidents ukon 69.32% ro waeong nagapangunang krimen, halin sa 176 paagto sa 54 nga insidente, kun sa siin kaibahan kara ro murder, homicide, physical injury, rape, theft, robbery, vehicle theft, ag motorcycle theft.
Ginpahayag pa ni Solis nga ro pagnaba it kaso hay kasunod it mga ginapatuman nga police visibility ag monitoring it PNP.
Samtang, kabilugan nga naging malinong ag matawhay ro selebrasyon it Bag-ong Dag-on sa bilog nga Western Visayas matapos nga owa it anuman nga nairecord nga major incidents.
Sa bahin it kapulisan suno kana hay naka-record sanda it 80 nga firecracker incidents hasta Enero 1.
Sa nasambit nga numero, 44 ro firecrackers ag 36 ro boga nga kaeabanan sa mga nabiktima hay mga menor de edad nga nag angkon it mga minor injuries.
Nakalista man sanda it mga stray bullet incidents ag sa mayad nga swerte hay owa it mga indibidwal nga naninahan.
Sa pihak nga parte, ginpasiguro man nana nga padayun ro monitoring ag pagtau it seguridad sa bilog nga rehiyon eabi eon makaron nga buean it Enero kon sa siin pagahiwaton ro mga mabahuean nga festival kapareho it Kalibo Ati-Atihan Festival ag Dinagyang Festival.
