KALIBO, Aklan—Mabahoe ro pagpati ni Kalibo Vice Mayor Cynthia Dela Cruz nga bilang sangka medical doctor hay sambilog ro home quarantine sa mga posibleng rason it gulping pagsirit it kaso it Coronavirus Disease 2019 ukon COVID-19.
Apang bangud sa kakueangan it isolation facility, pila sa mga pasyente nga asymptomatic ag may mild nga sintomas it sakit hay ginapasugtan nga mag-home quarantine.
Base suno kana sa record, kaabuan sa mga tinamaan it deadly virus hay magpamilya.
Kaeabanan suno kana nga owa nasusunod ro mga quarantine protocol kon ro sangka pasyente hay sa sueod eamang it baeay nagapamayad rason nga mataas ro chansa it taeapnan.
Pila sa mga raya hay ro pagguwa it pasyente sa anang kwarto ag pag-share it mga eating utensils ag banyo.
Samtang, pila pa sa posibleng rason it pagtaas it kaso sa banwa it kalibo hay bangud sa kaabuon it tawo nga naga-agto adlaw adlaw bilang raya hay sentro it komersiyo ag mga opisina.
Nasayuran nga sa masobra sa 300 nga aktibong kaso sa Kalibo, kapin sa 100 kara ro naka-home quarantine.
Sa pihak nga parte, suportado man ni Vice mayor dela cruz ro ginaduso ni Mayor Emerson Lachica nga magsueod sa joint venture sa sangka funeral homes para sa pagpatindog it kaugalingon nga crematorium.
Mag-eowas pa kara ro pag-usoy it eugta nga pagabutangan it burial grounds para sa mga namatay nga COVID victim.
