KALIBO, Aklan–Ginbuksan eun it Hong Kong ro andang border para sa mga turista maghalin sa nagkaeain eain nga mga nasyon.
Suno kay Bombo International Correspondent Mary Lou Bautista Borra nga tumandok it banwa it Batan apang presenteng nagatrabaho bilang domestic helper sa Hong Kong nga sa makarun hay bukas eun ro tanan nga international flight paadto ag pabalik sa Hong Kong.
Bangud kara maabo sigon nga mga OFW’s ro nakabalik eun sa andang trabaho matapos nga mapurnada bangud sa ginpatuman nga lockdown.
Samtang may pipila man sigon nga mga OFW’s nga nagmadali nga makauli sa Pilipinas matapos nga ginpanaba eun lang sa pitong adlaw ro ginapatuman nga quarantine.
Sa makarun hay amat-amat eun sigon sanda nga nakabalik sa normal bangud sa padayun nga pagnaba it mga nailistang kaso it covid-19.
Haeos nakalipatan eun man sigon it mga pomoeuyo ro dating mandatory nga pagself test agud masayuran kung raya hay positibo sa covid-19.
Sa pihak kara, padayun man nga gina-engganyo it andang gobyerno ro mga pomoeuyo nga magsunod sa gihapon sa health protocol agud nga indi eun mauman pa ro naexperiensiyahan nga surge.
