KALIBO, Aklan—Posibleng uman nga magapatuman it lockdown ro Hong Kong sa maabot nga Marso 17 bangud sa padayun nga pagsipa it mga nailistang kaso it coronavirus disease ukon covid-19.
Suno kay Bombo International Correspondent MaryLou Bautista Borra it Hong Kong nga ko mga nagtaliwan nga adlaw hay nakalista sa nasambitan nga nasyon it kapin sa 37,000 ka mga kaso it covid-19 ag 105 nga panibag-ong namatay sa sueod eamang it sang adlaw.
Sa makarun hay blangko pa sigon ro andang gobyerno sa rason it paglobo it mga nailistang kaso it nasambitan nga masakit.
Umpisa eamang sigon it pagtapos it Chinese New Year hay maabo eun ro nagpositibo sa covid-19.
Sa makarun hay punuan eun ro mga ospital samtang nagatambak man ro mga cadaver sa crematorium facility.
Samtang nagakaubusan man ro suplay it pagkaon matapos nga magpanic buying ro kaabuan bilang prepasyon sa paeaabuton nga lockdown nga ginabana-bana nga magaabot it 10 diyas.
