KALIBO, Aklan—Nagpatuman it striktong monitoring ro gobyerno it Hong Kong matapos nga makasueod eon sa andang rehiyon ro Omicron variant it COVID-19.
Suno kay Bombo International Correspondent Marylou Bautista Borra it Hong Kong nga na-diskubre ro bag-ong kaso it Omicron variant sa sangka empleyado it airline company kung siin owa raya nagpaidaeom sa home quarantine kamana man nga nag-adto pa sa mga restaurant.
Bangud kara, uman nga nagpadumdom ro gobyerno nga magdahan ro mga pumueoyo ag padayun nga magsunod sa ginapatuman nga protocols.
Presente sigon nga ginabantayan it gobyerno ro paghueag it kaso sa sueod it daywang dominggo.
Engkaso nga makaangkon it pagtaas hay posibleng uman sanda nga magpatuman it lockdown agud nga makontrol ro pagkalhit it infection.
Ginpundo eon man sigon ro pagpasueod it mga dumueo-ong sa Hong Kong matapos nga kanselahon ro mga international flights.
Ginpahayag dugang nga ginabawaean ro pagsueod sa mga mall ag restaurant it mga indibidwal nga bukon it bakunado.//
Sa pihak nga parte, posibleng maapektuhan ro preparasyon it mga pumueoyo para sa nagahilapit nga Chinese New Year kasunod it pagkalista it kaso it Omicron variant.
Ro nasambit nga okasyon hay sambilog sa ginataw-an it mabahoe nga importansya it mga Chinese kada dag-on.
Suno kay Borra, masami nga nagaprepara ro mga pumueoyo sang dominggo antes ro pagsug-aeaw sa Chinese New Year.
Dikara sigon makita ro pagiging masako it kaabuan kamana man ro pagpamakae it nagkaeain-eain nga dekorasyon para isab-it sa mga panimaeay, karsada ag parke.
Naga-preparar man sigon sanda it maabu nga mga pagkaon ag ilimnon kaeakip eon kara ro pilang ka mga Chinese tradition.
