NEW WASHINGTON, Aklan — Kadungan it selebrasyon it Pista Minatay 2025, sangka horror house ro gintukod sa Museo Kardinal sa New Washington, Aklan.
Apang bukon it mga makahaeadlok nga elemento ro makita sa sueod, kundi ro presenteng sitwasyon nga nagatub-eag ag nagatuga it kahadlok makaron sa mga Filipino.
Nagapanguna kara ro nagakatabu nga korapsyon ag gutom nga makasueubo nga isipon.
Suno kay Zjann Bilbao, caretaker it museum nga ro titulo it andang gin obra nga exhibit hay ro ‘The Sorrowful Mystery’, kun sa siin sambilog sigon raya sa mga misteryo sa Holy Rosary nga nakataeana para sa buean it Oktubre.
Makita suno kana sa sueod it horror house ro maeain nga epekto it mahigku nga politika, partikular ro kapigaduhon ag pagkaduea sa haega it kabuhi it tawo.
Samtang, ro nasambit sigon nga ideya hay naghalin kay Fr. Justy More, chancellor it Diocese of Kalibo .
Naging inspirasyon kara ro mga palpak nga flood control projects kapareho it nasamad nga estaka sa Mobo ag ro seawall sa banwa it New Washington ag sa iba pang parte it nasyon.
Sangka pamaagi man raya agud nga ipakita it pamunuan it museum nga nagabuylog sanda sa pagprotesta it mga tawo ko Setyembre kontra sa nabulgar nga flood control scam nga samtang owa pa it hapasabat sa mga eakot sa anomaliya hay padayun nga pagamoetuhon it korapsyon ro mga pumueuyu.
Madumduman nga sambilog si Jaime Cardinal Sin sa mga nagapanawagan angot sa good governance.
